गडचिरोली, दि. 14 एप्रिल 2025 ज्यांनी वर्षानुवर्षे बंदुका हातात घेतल्या, जंगलात संघर्ष केला, असे जहाल माओवादी आता समाजाच्या मुख्य प्रवाहात सामील होणार आहेत — आणि यामागे आहे गडचिरोली पोलीस दलाचा नावीन्यपूर्ण उपक्रम, ‘प्रोजेक्ट संजीवनी’.
पोलीस अधीक्षक श्री. नीलोत्पल यांच्या संकल्पनेतून सुरू झालेल्या या प्रकल्पाचा शुभारंभ आज गडचिरोलीत झाला. 4 आत्मसमर्पित माओवादी सदस्यांसाठी रो-हाऊसच्या बांधकामाचे भूमिपूजन त्यांच्या हस्ते करण्यात आले. या कार्यक्रमास वरिष्ठ पोलीस अधिकारी आणि 50 हून अधिक आत्मसमर्पित माओवादी सदस्य उपस्थित होते.
‘प्रोजेक्ट संजीवनी’ अंतर्गत आत्मसमर्पण केलेल्या माओवादी सदस्यांना केवळ सुरक्षितता नव्हे तर नवे आयुष्य मिळणार आहे. शासनाच्या योजनांचा लाभ सहजपणे मिळावा यासाठी आर्थिक सहाय्य, घरे, ओळखपत्रे, कौशल्य प्रशिक्षण, रोजगाराच्या संधी, वैद्यकीय सेवा, समुपदेशन, आणि महिलांसाठी सक्षमीकरणाचे विविध उपक्रम राबवले जाणार आहेत.
सन 2005 पासून आतापर्यंत एकूण 704 माओवाद्यांनी गडचिरोली पोलीस दलासमोर आत्मसमर्पण केले आहे. विशेष म्हणजे, केवळ 2025 मध्येच 22 माओवाद्यांनी आत्मसमर्पण केल्याची माहिती समोर आली आहे. हे यश केवळ पोलिसांच्या माओवादीविरोधी प्रभावी अभियानाचे नाही, तर त्यांच्या संवेदनशील आणि समावेशक दृष्टिकोनाचेही आहे.
या प्रकल्पाच्या यशस्वी अंमलबजावणीसाठी आत्मसमर्पण शाखेचे प्रभारी अधिकारी पोउपनि. नरेंद्र पिवाल आणि त्यांच्या सहकाऱ्यांनी मोलाचे योगदान दिले.
प्रोजेक्ट संजीवनी केवळ एक पुनर्वसन योजना नाही — ती एक नवजीवनाची वाट आहे.
माओवाद्यांचे हात आता बंदुकीऐवजी रोजगाराच्या साधनांकडे वळणार का? ‘प्रोजेक्ट संजीवनी’ त्यांचं भविष्य बदलू शकणार का? हे पाहणं औत्सुक्याचं ठरणार आहे.
0 Comments