‘हरितक्रांती’ नव्हे, ‘नशा क्रांती’ गडचिरोलीत गांजासह आरोपी अटकेत

गडचिरोली :एका बाजूला शेतकऱ्यांना आधुनिक शेतीकडे वळवण्यासाठी सरकार प्रयत्नशील असताना, दुसऱ्या बाजूला एका तथाकथित "शेतकऱ्याने" शेतजमिनीचा वापर केला तो थेट ‘नशेच्या पीकासाठी’. गडचिरोली जिल्ह्यात पोलिसांनी एका शेतात छापा टाकून जो प्रकार उघडकीस आणला, तो धक्कादायक आहे.

19 मे रोजी कुरखेडा उपविभागातील मालेवाडा पोलीस मदत केंद्राला एक गोपनीय माहिती मिळते. मौजा दामेश्वर गावात एक इसम आपल्या शेतात काही संशयास्पद पीक घेत आहे आणि ते घरात साठवून विक्रीसाठी ठेवले आहे. ही माहिती मिळताच पोलीस यंत्रणा सतर्क झाली.

पोलिसांच्या एका अनुभवी पथकाने लगेच नियोजनबद्ध कारवाईस सुरुवात केली. वरिष्ठांच्या मार्गदर्शनाखाली अधिकारी गावात दाखल झाले. त्या घरात पोहोचून पंचासमक्ष कायदेशीर झडती घेतली, तेव्हा सगळेच अवाक झाले.

घरात चार मोठ्या चुंगळ्यांमध्ये ओलसर, हिरवट, पांढरट मिश्र रंगाचा अज्ञात पदार्थ सापडला. त्याची तपासणी केली असता तो गांजा असल्याचे स्पष्ट झाले. वजनात तो 28 किलोपेक्षा अधिक, तर बाजारमूल्य 1 लाख 12 हजार रुपयांहून अधिक निघाले.

तेवढ्यावरच थांबत नाही — पुढील चौकशीत जे उघड झाले, ते अजूनच धक्कादायक. संबंधित इसमाने हा गांजा बाजारातून आणलेला नसून, स्वतःच्या शेतात पिकवलेला असल्याचे कबूल केले. तो शेतकरी नव्हता, तर एका ‘नशेच्या शेती’चा गुप्त व्यापारी होता.

मोहन यशवंत कोवाची (वय 42, रा. दामेश्वर) असे या आरोपीचे नाव असून, त्याच्याविरोधात एनडीपीएस कायद्याअंतर्गत गुन्हा नोंदवण्यात आला आहे. मुद्देमाल ताब्यात घेण्यात आला असून, पुढील तपास पोउपनि. अभिजीत पायघन करीत आहेत.

ही कारवाई पोलीस अधीक्षक नीलोत्पल, अपर पोलीस अधीक्षक यतिश देशमुख, एम. रमेश, तसेच उपविभागीय अधिकारी रविंद्र भोसले यांच्या मार्गदर्शनाखाली पार पडली. एकेकाळी पीक पिकणाऱ्या शेतजमिनीत जेव्हा 'नशेची बी' पेरली जाते, तेव्हा ती केवळ जमीनच नाही, तर समाजाचाही ऱ्हास करणारी ठरते — हे या प्रकरणातून पुन्हा एकदा अधोरेखित झाले.